|
Pyeslər |
VƏFA
Səkkizinci şəkil
Firuzə - Bu şeri ona yazdığını bildimi?
İntizar - Yox. Kədər xoşbəxtlərin dilinə tərcümə edilməyən bir dastandır, Firuzə. Mən bunu bildiyim üçün də şerimi oxudum.
Bahadır, leytenant Əli ilə gəlir.
Firuzə - Mən sənin kimi şairə olsaydım, İntizar, bizim kapitana lap böyük, ey… "Min bir gecə" nağılı boyda bir dastan yazardım.
İntizar - Kapitan haqqında dastan yazmaq çətindir, Firuzə, belə adam dastana sığmaz.
Firuzə - O gecə onu görəndə mən gözlərimə inanmırdım. Üzü-gözü qan idi.
Bahadır (Əliyə) - Hücumun əsas mənası da burdadır. Qoy düşmən arxadan arxayın olub bütün gücünü bura versin.
Əli - İndi çatmış olarlar.
Bahadır - Atışma səsi gəlmir. Demək, onlar xətti gizli keçə bildilər.
Əli (Bahadıra) - Birdən uşaqlar davam gətirməyib qalxsalar, bütün planlar pozula bilər, kapitan.
Bahadır - Mən onlara inanıram. (Qızları görür). Qızlar, kimi gözləyirsiniz?
Firuzə - Kombat əmr elədi ki, ha burda gözləyək, qabağa gedəcəyik.
İntizar - Yaranız necədir, kapitan?
Bahadır - Sən bağlayan yara heç ağrıyarmı? (Gülür).
Firuzə - Kapitan, sizə məktub vardı, aldınızmı?
Bahadır - Aldım.
İntizar - Vəfadandırmı?
Bahadır - Vəfadan… Mən bu adı unutmağa çalışıram.
İntizar - Siz bu adı unutsaydınız, bu, dünyada işlənən cinayətlərin ən böyüyü olardı, kapitan.
Bahadır - Mən də bir zaman elə düşünürdüm. (Əli uzaqlaşır).
Firuzə - İntizar, gedək, vaxtdır.
İntizar (cibindən bir kağız çıxarıb Firuzəyə verir) - Bu, cəbhədir, Firuzə, əgər mən ölsəm, bu məktubu kapitana verərsən.
Firuzə - Sən nə danışırsan, İntizar?
İntizar - Əgər sağ qalsam, yenə də özümə qaytararsan. (Tərəddüd edən Firuzəyə baxır). Bu mənim yoldaşlıq təvəqqemdir.
Firuzə məktubu alır. Gedirlər.
Bahadır - Xətt hazırdırmı?
Telefonçu - Hazırdır, yoldaş kapitan. (Gedən qızların dalınca baxır, növbətçiyə müraciət edir). Növbətçi, leytenant Balayı telefona çağır.
Telefonçu - Leytenant Balayı telefona çağırım? Baş üstə!
Bahadır (Əliyə) - Mənim müəllimimin qızıdır. Bu sanitar qız Vəfa ilə bir məktəbdə oxuyurdu.
Əli - Çox qoçaq qızdır. Srağa gün təkbaşına 28 yaralını xilas edib. Ancaq dərdli adama oxşayır. O dediyin həkim oğlan bunumu sevir?
Bahadır - Bəli, İlyas, bu qızı sevir. Ancaq İntizar ona həmişə "qardaş" deyir.
Əli - Keçmə bu qızların da "qardaş-qardaşından". Söhbətin şirin yerində birdən görürsən - qardaş!
Bahadır - Sən bu qızı tanımırsan! Bu, həssas bir şairdir. Bəzi dil pəhləvanları voyenkomata gedib özlərinə bron düzəldəndə, bu, könüllü cəbhəyə gəldi.
Telefonçu - Yoldaş kapitan, leytenant Balayı çağırdım.
Bahadır (yaxındakı qazmaya girir) - Allo, Balay, odunları hazırladınızmı? Ocaqları yaxşı qalayırsınız. Mən sənə od göndərəcəyəm. Hərə öz yerini bilsin, anladınmı? Vaxta az qalır. Azarlıların kefini tez-tez soruşun.
Əli (saatına baxır) - Vaxt nə ağır keçir.
Bahadır - Leytenant, darıxırsan? Müharibə səni əsəbiləşdirib…
Əli - Yox, kapitan, belə müharibələr məni əsəbiləşdirə bilməz. Hərdən oturub fikirləşəndə, görürəm ki, bütün keçirdiyim müharibələrdən ən dəhşətlisi arvadımla apardığım müharibədir.
Bahadır - Həm də ki, hər dəfə yəqin məğlub olmusan!
Əli - Sülh şərtləri də çox ağır olub.
Uzaqdan yaşıl bir fişəng atılır. Eyni zamanda güllə səsləri havanı doldurur.
Bahadır - Başlandı! (Saatına baxır). Leytenant, sağ cinahla əlaqə saxlayın!
Əli - Baş üstə. (Qazmaya girir.)
İkinci, üçüncü fişəng atılır. Sağ tərəfdən atılan fişəng ona cavab verir.
Bahadır (Əliyə) - 3-cü bölük tutduğu yerdən tərpənməsin, ehtiyat avtomatçılar dəstəsi əmrimi gözləsin.
Əli - Baş üstə!
Cəfərqulu (yaxındakı səngərdən sürünüb çıxır) - Toplar, tanklar, bax, div kimi gəlir.
Əlimərdan - Hara?
Cəfərqulu - Hər tərəfimizi bürüyüblər.
Əlimərdan - Səngərə gir, zalım oğlu, bizi də bada verərsən!
(Onun qolundan yapışıb səngərə sürüyür. Gurultular şiddətlənir).
Əli - Balay deyir, hissələr tikanlı məftili aşdılar. Düşmən arxasındakı hissəmiz hələlik susur. Düşmən bütün qüvvəsini bura atıb.
Bahadır - Balaya əmrimi yetir. Almanlar tərəfindən yandırılan məscidin solunda yer tutsun.
Əli - Düşmən tankları bizim istiqamətdə irəliləyir. Allo, kapitan, danışan rabitəçi qızıl əsgər Daşdəmirdir. Düşmən tankı onun olduğu səngərin üstündədir.
Bahadır (telefona gəlir) - Daşdəmir, allo, lap səngərin dibinə yat, qorxma, Qafqaz torpağı namərd çıxmaz. O, səni saxlayacaqdır. Torpağa qısıl, qardaşım, mətanətlə dayan. Allo, allo… (Leytenanta müraciət edir). Tank yerində burularaq onu altında əzmək istəyir. Allo, 14, çox gözəl, beşi məscidin sol tərəfində. (Dəstəyi leytenanta verir). Balaya xəbər vermək lazımdır.
Firuzə ilə başqa bir sanitar yaralı İntizarı gətirirlər.
