VƏFA
Səkkizinci şəkil

---

Firuzə - İcazə verin.
Bahadır (diqqətlə baxır) - İntizar!

Firuzə İntizarın yarasını bağlamaq istəyir.

İntizar - Firuzə, toxunma. Of…
Bahadır - İntizar…
İntizar - Kapitan, sizsiniz, mənim əziz kapitanım, of…
Bahadır - İntizar, mərd ol, səndə nə var ki!
Firuzə - Telefonçunu yanan tankın altından çıxardıb geri süründük, bir az aralanmışdıq ki, İntizarı vurdular.
İntizar - Kapitan, hanı mənim gümüş ulduzum? Yoxsa söndü. Yox, yox, mən ölmək istəmirəm. Kapitan, mənim gümüş ulduzum, anamın saçları kimi gümüş rəngində mənim ulduzum hanı?
Bahadır - İntizar, danışmaq olmaz, bu saat səni qospitala apararlar.
İntizar - Kapitan, sənin saçların da gümüş kimi ağaracaqdır. Hanı mənim ulduzum, gümüş ulduzum, kapitan? O, mənim bəxt ulduzum idi. Söndü… (Kapitan üzünü kənara çevirir). Sənin göz yaşların da gümüş kimidir, kapitan…
Bahadır - Tez aparın, professor özü baxsın.
İntizar - Hanı mənim ulduzum? Ana, gümüş saçlarını yığışdır, qana batar. Mənim ulduzum da qırmızı rəngə boyanmışdır. Yoxsa o da yaralanmışdır? Vəfanın gözləri də sənin həsrətindən qırmızıdır, Bahadır. Yox, ölmək olmaz. Düşmən sağdır. Mənim ulduzum hanı?
Onu aparırlar.
Bahadır - "Ölmək olmaz, düşmən sağdır"… Doğrudur, İntizar, belə bir zamanda ölmək namərdlikdir. Düşmən sağ ikən, ölmək olarmı? (Durbinlə baxır. Hava işıqlanmışdır). Aha, siz belə cəhənnəm gözləmirdiniz. İndi də o birisi sola döndərdi. Vur, Balay, gözünə dönüm, vur! Qoy yansın! Bu tank məşəllərinin işığında Almaniyanın eybəcər sifəti daha aydın görünər. Vurun, yanan ana qəlblərinin atəşini, axan göz yaşlarının hərarətini ancaq bu alovlar söndürəcəkdir. İntizarın qana boyanmış saçlarını ancaq düşmən qanı ilə yumaq olar. Vurun, düşmən sağdır, ölmək olmaz. Vurun, qardaşlar!
Əli - Kapitan, düşmən arxasındakı dəstəmizdən səs çıxmır.
Bahadır - Darıxma, leytenant. Biz Xasay kimi oğulu bu yolda qurban vermişik. Müharibə dəqiq bir maşın kimidir, orda tələsmək və gecikmək hər ikisi fəlakətə səbəb ola bilər.
Telefonçu - Yoldaş kapitan, "Kiyev" cavab vermir.
Bahadır - Leytenant, on dəqiqəyə xətt hazır olmalıdır!
Əli - Baş üstə!
Telefonçu - Yoldaş kapitan, sizi çağırırlar.
Bahadır (telefonu alır) - Allo, mənəm, hələlik lazım deyil, vəziyyət ciddidir. Sanitar qız, İntizar, "Qızıl ulduz" ordeni ilə?.. Baş üstə! (Dəstəyi qoyub, yenidən götürür.) Allo, allo, Tulanı ver, kimdir, professor? Allo, professor, yaralı sanitar qıza, bəli, İntizara xəbər verin ki, "Qızıl ulduz" ordeni ilə təltif olunmuşdur. Necə? (Dəstək tutan əli ixtiyarsız aşağı düşür, sonra ağır-ağır dəstəyi qaldırır). Professor, qəhrəman qızı əsgəri qayda ilə basdırın.
Telefonçu - Heyf!
Bahadır - İntizar qızıl ulduzunu tapanda, gümüş ulduzunu itirdi.
Əli - Yoldaş kapitan, "Kiyev"lə rabitə mümkün deyil. Düşmən tankları irəli keçmişdir. Yeddi tank irəliləyir.
Bahadır - Yeddi? Azdır. On dördü hələ daldadır. Ancaq mətanət, əsəb möhkəmliyi məsələni həll edir. Bizimkilər tələssələr, hər şey məhv olar.
Əli - Bir nəfər də səngərdən qalxmamışdır. Ölən ölmüş, qalanlar səngərlərdədir. Ancaq…
Bahadır - Nə ancaq?..
Əli - Tank desantı blindaja soxulmuş, rabitə kəsilmişdir.
Bahadır - Uşaqlara xəbər ver, bir güllə də atmasınlar, düşmən avtomatlarını irəli buraxsınlar.
Əli - Baş üstə.
Bahadır durbinlə qabağa baxır.
Cəfərqulu (yenə sürünüb səngərdən çıxır) - Məhv olduq, amandır!
Əlimərdan - Namərd oğlu, hara çəkilirsən!
Cəfərqulu - Əzdi… qaç, parçaladı.. Parçaladı, amandır, aman. (Qalxmaq istəyir).
Bahadır - Hara! Səngərə gir!
Cəfərqulu - Gəldilər, tanklar, parçaladı. (Qaçmaq istəyir).
Bahadır (güllə ilə onu vurur) - Geri yol yoxdur!
Əli (birdən Bahadırın qolundan yapışır. Onun gözləri uzaqlara dikilmişdir) - Odur… odur…
Bahadır - Kim? Nə?
Əli - Vağzalda gördüyüm haman xaindir.
Bahadır - Hansı xain, bumu?
Əli - Yox, yox, o da bunun kimi öz canını qurtarmaq istədi. Ən ciddi vaxtda qaçdı. Öz yoldaşını vurdu, yaraladı. Mən onun dalınca atdım, dəydi. Sol çiynindən, hə, hə… Elə bildim öldü. Mən bir gün sonra ayıldım, hə, dediyim vağzaldakı adam odur. Mən elə bildim ki, o da belə şərəfsiz öldü. Sağ imiş…
Bahadır - Adı nə idi?
Əli - Bilmirəm. O, bizim hissəyə yeni gəlmişdi.
Müşahidəçi - Kapitan, kapitan, düşmənin axırıncı tankı ikinci nişan xəttini keçdi.
Bahadır - Leytenant, siqnal fişənglərini hazırlayın.
Əli - Siqnal fişənglərini!
Bahadır (mühafizəçiyə) - Son nişan xəttini görürsənmi?
Əlimərdan - Axırıncı tank son nişan xəttini keçir. Dayandı, sola buruldu.