|
Pyeslər |
VƏFA
Üçüncü şəkil
Balağa Minnətovun evi. Etajerkada kitablar yığılmışdır. Divarda sıra ilə portretlər asılmışdır. Bir tərəfdə böyük xətlə "Rica olunur bərkdən danışmayasınız, ürəyi xəstə olan var!" sözləri yazılmış bir lövhə görünür. Mirzə Pomoşnik stolun üstünü düzəldir.
Minnətov (telefonla danışır) - Yox, yox, sən öləsən, kasatsiya yazmışam, necə baş tutmaz? Canım sağ olsun, yenə əlli faizi var ki. Hə… hə…
Pomoşnik - Ay kişi, vallah səni gərək lap ingilis padşahına köməkçi qoyalar. Bu tədbir ki səndə var, nə deyim!
Minnətov - Mirzə, tədbir yerində, ancaq işlər yaxşı getmir. Zəhmət çəkdik, ova çıxdıq, amma zəhrimar tilova gəlmir ki, gəlmir…
M.Pomoşnik - Yəni sənin tədbirin işləməyən yer də var?
Minnətov - Var, ay Mirzə, var. Yaxşıdı ərini vağzaldan qaytardıq. Sən özün bilirsən ki, mən bir arvada bir saat, bir gün, lap uzaq başı, özünü öldürsə, necə deyərlər, defisit mal olsa, üç gündən artıq sərf eləmərəm. Bu zalımın qızına neçə aydır bir yan ala bilmirəm ki, bilmirəm.
M.Pomoşnik - Ətirfilan kar açmır?
Minnətov - Yox.
M.Pomoşnik - Naxışlı çulki?
Minnətov - Yox.
M.Pomoşnik - Krepdişin?
Minnətov - Yox! Yox!
M.Pomoşnik - Pah atonnan, yaxşı, modelni tufli?
Minnətov - Yox ey… Belə şeylərlə onu fəth eləmək olmaz.
M.Pomoşnik - Ay kişi, onda bu arvad olmadı ki, lap blindaj oldu, blindaj!
Minnətov - Bəli, Mirzə, o belə arvaddır. Bu gün gör mənə nə yazır. Mən ona dərdimi yazmışam, ay ürəyim şikəstdir, ay ölürəm, ay sənsiz gecəm-gündüzüm yoxdur. Gör mənə nə cavab yazır. (Kağızı verir).
M.Pomoşnik - "Vətəndaş Minnətov" …Vətəndaşa bax ha… " Qəlbinizin şikəst olduğundan və məni dərya qədər bir məhəbbətlə sevdiyinizdən yazırsınız. Mən Əlillər İttifaqı deyiləm. Həkimlikdən də başım çıxmır. Sizin şikəst olduğunuza təəssüf edirəm. Ancaq belə mənasız məktublarla bir də mənə müraciət etməyin. Sizin məktubunuzu alandan sonra son dəfə deyirəm ki, bizim aramızda heç bir səmimiyyət ola bilməz. Mən bu vaxta qədər sizə qarşı əlaqəmdə yanılmışam. Görünür, siz ancaq özünü düşünən bir eqoistdən başqa bir şey deyilsiniz. Əminəm ki, bir də mənim adımı tutmayacaqsınız. Vəfa".
Minnətov - Görürsən, Mirzə?
M.Pomoşnik - Lap Qəhrəmanov yazan hökmə oxşayır.
Minnətov (diqqətlə kağıza baxır, birdən barmağını dişləyir) - Mirzə, bir dayan. Sən öləsən, tapmışam. Aha, belə, belə, vəssalam. Lap yerinə düşüb. Yaxşı, indi, Vəfa xanım, səninlə Bahadırın görüşməyi getdi qurdnan qiyamətə!
M.Pomoşnik - Ay kələk professoru, yenə nə düzəltdin?
Minnətov - Mirzə, sən öləsən, heç belə şey ələ düşməz. Bax, bu birinci sətri pozuram. Vətəndaş, şikəst, qəlbin, filan. Qalanı qalır…
M.Pomoşnik - Nə olsun?
Minnətov - Hə, onu sən başa düşməzsən. Elə ki bu məktub cəbhədə Bahadıra çatdı, onda daha Vəfa xanım, xudahafiz… Lap yerinə düşdü, gərək hərifi qoymayasan ayılmağa.
M.Pomoşnik - Axı nə olub, belə düşmüsən onun dalına. Arvad azdır bəyəm?
Minnətov - Yox, Mirzə, burda hikmət var. Bahadır gərək bura gəlməyə, bu bir. İkincisi, sən ki arifsən. Prokuror ki oldu bizim əlimizdə, ondan sonra gör nə gəlhagəldir. Onu yola gətirsəm, daha bir vəkil qabağımda durmaz. Yola gəlməsə də, elə-belə qoy bizi teatrda, evlərində, bir-iki dəfə bir yerdə görsünlər, bəsdir.
Çöldə öskürək səsi gəlir. Minnətov o biri otağa keçir.
Vəzir (başını içəri salır) - Mirzə, salam!
M.Pomoşnik - Buyur, Vəzir qədeş, buyur!
Vəzir - Yoxsa Balağa yenə məşğuldur? Lap kor kimi, ayağımı yerə sürtə-sürtə gəlmişəm!
Minnətov (gəlir) - Əşi, gəl çıx da.
Vəzir - Nə var yenə, xeyir ola?
Minnətov - Nə olacaq, heç nə, sağlığın. Elə-belə könlümə düşmüsən.
Vəzir - Bir yandan bu qaranlıq, bir yandan da Allanın nazqəmzəsi. Zalımın qızı deyir "beşulduz" olmasa, ayağımı qoymaram (Cibindən konyak çıxarır).
Minnətov - Yoxsa Alla xanımı da çağırmısan?
Vəzir - Bəs necə? Allahı da, Şeytanı da. Ancaq deyir saat ondan qabaq gələ bilmərəm.
Minnətov - Doktor, onlara lap nahaq demisən.
Vəzir - Təzə xəbər, necə yəni nahaq demisən, yoxsa Mirzə Pomoşniklə dübədü vurmaq istəyirsən? Yoxsa iclasdır?
Minnətov - Yox, iclas deyil. Qulaq as, Zeynəboğlunun qardaşı vardı ha…
Vəzir - Hə, hə…
Minnətov - O məsələ yenə təzələnib.
Vəzir - Balam, daha mən neyləyim? Analizi neçə dəfə düzəldərlər? Keçən dəfə onu azad elədim, indi özgə komissiya göndəriblər. Ordakı doktorların içində bir kişi yoxdur ki, söz deyəsən söz eşidə.
Minnətov - Doktor, deyəsən məsələ lap böyüyüb… Zeynəboğlunu başımızdan rədd eləmək lazımdır.
Vəzir - Bəs bu gəlhagəl? Bu xam-xurd, hamısı onun sayeyi mərhəmətindən deyilmi?
