Dost ölümü ağır olur. Etiraf
edirəm ki, dəfələrlə eşitdiyim və
oxuduğum bu ifadənin gücünü mən
Rəsul Rzanın ölüm xəbərini qəflətən
eşitdikdə tam duya bildim. Bu acı xəbər
məni elə sarsıtdı ki, yerimdə donub qaldım,
bir neçə dəqiqə özümə gələ
bilmədim.
Rəsulun dəfinindən keçən
ağır günlər göstərir ki, bu sarsıntılı
hisslər şairin yaxın dostları və pərəstişkarları
kimi, məni də uzun müddət tərk etməyəcəkdir.
Axı, bizim Rəsul ilə dostluğumuzun yarım
əsrlik yaşı vardır. Özü də
necə dostluq. Əməldaş, dərddaş,
sirdaş, qardaş! Məqalələrinin birində
Rəsul yazmışdır ki, mənim Cəfər
Cəfərov və Abbas Zamanov ilə dostluğum
1942-ci ildə Kerçdə, müharibənin odlu-alovlu
günlərində sınaqdan çıxıb bərkimişdir.
Bir-birini sürətlə əvəz
edib keçən illərdən bizim dostluğumuza
bir ləkə belə düşməmişdir.
Rəsul Rza xalqın ağlının,
şüurunun, fəlsəfəsinin, milli varlığının
təcəssümü olan çağdaş şerimizin
ən yüksək dağ zirvələrindən
biridir. Yadımdadır, 1941 -ci ilin avqust günlərinin
birində Bakıda antifaşist mitinq keçirildi.
Mitinqdə Rəsulun da gur səsi eşidildi. O,
çıxışının sonunda "bir qıy
vurram, göydə uçan quba-qazlar qanad salar" misralı
şerini də oxudu. Rəsul kürsüdən
düşəndə Səməd Vurğun ona yanaşıb
dedi;— Ay Rəsul, afərin sənə, bu misranı
yaman deyibsən, bu misra bir şair yaradıcılığına
bərabərdi!
Bele misralar, belə beytlər Rəsulun
yaradıcılığında bir deyil, beş deyil,
on deyil, yüzlərlədir. Rəsul zərbül-məsəllərə
çevrilən şah misralar, şah beytlər, hərəsi
bir dastana bənzər müdrik şerlər, geniş
epik lövhələr şairidir. Rəsul heç
kəsə oxşamır. Poeziyamızın tarixində
onun öz dəst-xətti, öz səsi, istedadlı
şairlər nəsli tərbiyə edib yetişdirən
ədəbi məktəbi vardır.
Qardaş tatar xalqının əfsanəvi
oğlu Musa Cəlil demişdir: Elə yaşa ki,
öləndən sonra ölmə!
Rəsul Rza zəmanəmizin öləndən
sonra ölməyən şairidir. Rəsul dünən,
bu gün olduğu kimi, "yarın da mübarizələrin
ən ön sıralarında" dayanacaqdır.
Rəsul, qardaşım! Mən sənə
"əlvida" demirəm. Çünki sən bizimlə
də, bizdən sonrakılarda da çiyin-çiyinə
yaşayacaq, insani səadəti, insan ləyaqəti
uğrundakı döyüşlərini davam etdirəcəksən.
